خرج المخرج محمد حمدي، مخرج فيلم "صابر جوحل"، عن صمته تجاه المشكلات التي حدثت بينه وبين الفنانة الشابة سارة سلامة، أثناء تصوير الفيلم.

ووجه "حمدي" رسالة شديدة اللهجة لها عبر حسابة الشخصي بموقع التواصل الاجتماعي "فيس بوك" قائلا: "أصدقائي الصحفيين المحترمين حضراتكم ياما كلمتوني وسألتوني عن الممثلة سارة سلامة وأنا كنت متمسك بردودي المتحفظة والمحترمة واعتبرت نفسي أكبر من الرد على سارة سلامة، لكن الحقيقة هي مصممة على الاستمرار والتصريحات المسيئة لشخصي وللفيلم، ولذلك قررت أرد وأوضح بعض الأمور الخاصة بعمل الممثلة في الفيلم، وأهمها أنها بتدعي أن السيناريو اللي تعاقدت عليه مختلف عن الفيلم النهائي اللي أنا عملته وبالمناسبة دي هقول أهم واقعة وأغرب واقعة ممكن يشوفها مخرج في حياتة".

وأضاف: "أن الممثلة بعد التعاقد واستلام نسخه السيناريو قبل معاد التصوير بثلاث أسابيع لم تقرأ جملة واحدة، وده باعترافها، لما حضرت أول يوم تصوير ليها وبعد محاولاتي لعمل جلسات عمل معاها قبل التصوير ودايمًا مسافرة أو مشغولة أو مبتردش على التليفون خالص أو قافلة التليفون وهكذا، لمدة 3 أسابيع ولما حضرت أول يوم سألتها عن السيناريو وكان الرد الصادم، بصراحة ملحقتش اقرأ بس أنا عارفة إني طالعة مرات رجب وأني مبخلفش ثم ضحكة طويلة".

وتابع "طبعًا أنا مضحكتش أنا اتخضيت واتصدمت وجالي ضغط وسكر وقلب وزغلله وكل أمراض الدنيا في لحظة واحدة وقولت لنفسي روحنا ف داهية يا حمدي وربنا يسترها بقى، ده الحقيقة أهم حدث في أول يوم والحدث ده يلخص ببساطه هذه الشخصية، أما بقى عن مواعيدها، ومكياجها الأوفر دي حاجات مش هتكلم فيها لأن الكل عارفها كويس".