حرصها على الظهور بشكل مختلف وأنيق، دفعها للإختراع والخروج عن المألوف، بدأت مشوارها في الصف الأول الثانوي باختراع ضفيرة طويلة من الخيط متصلة بخصلات الشعر، وبعد مرور عام بدأت بإحضار مجموعة من الخيوط العادية بألوان مختلفة، قامت بلفها على جزء من شعرها ليظهر لها شكل مختلف يسمي "hair wraps"، "الخيط لف غلط معايا بس طلع بشكل جديد ومختلف جدًا، ولما أصحابي شافوه عجبهم".

"مارينا حنا" صاحبة الـ20 عام، طالبة بقسم الإعلام، جامعة عين شمس، أول من أدخلت الـ "hair wraps" في مصرمنذ 4 سنوات، وهذا الشكل يرجع أصله إلي قبائل من الهنود الحمر تدعي "hippies aw bohemian"، تقول: "لما الناس بدأت تكتر وتسألني بتعمليهم ازاى وفين قولت هعملهم أنا للناس واستفيد، وبدأت أتقنها أكتر واعملها لناس معرفهاش وخدت أجر رمزي على شغلي ده، ومكنتش لسه أعرف اسمها، بس حد من أقاربي قالي اسمها وعملت سيرش ولقيت أشكال منها بس غير اللي انا بعملها، هي معروفة بس خارج مصر".

وتضيف "مارينا": "فرحت أوي إني عملت حاجة جديدة، وقولت هفضل شغالة فيها وهكمل، ومفكرتش أعمل بيدج على فيس بوك وقتها، بس لما لقيت بنات عجبتهم الـhair wraps، بتحاول تخلي حد يعملها ليهم لأنهم مش عارفين يتعاملوا معايا، شوفتها ومكنتش بنفس الدقة اللي بعملها ومش زيها، كانت أي كلام ومش حلوة، وقتها عملت بيدج اسمها hair wraps، علشان الناس تعرفني، واللى عاوز اللي اعمله وتبقى شغل ليا".

وتؤكد "مارينا" أن المشكلة التي واجهتها بعد أن أنشأت صفحة خاصة بها على موقع التواصل الاجتماعي فيس بوك أنها لم تضع علامة مائية على الصور التي تعرضها مما عرضها للسرقة: "ناس خدت الصور اللي فيها شغلي ونسبوها ليهم وبعدها بدأت احط اللجو بتاعي على الصور، وأنواع الخيط مش لازم تكون معينة المهم يكون تخين علشان يساعدني، وبتاخد مني 20 دقيقة لو شعر متوسط، وألوانها بتكون حسب رغبة البنات".

وتواصل: "بعمل الواحدة بـ30 جنيه، وفي محجبات كمان بيطلبوها مني، بشتري الخيط من أي محل عادي وبضيف خرز أو ريش معاها، ومن بعد البيدج بتاعتي أتعرفت ونزلت كارنفالات كنت بحجز فيها ترابيزة والبنات تجيلي وأعملهم، وحاليًا متعاقدة مع كوافير بقابل فيه البنات وقت ما يطلبوني، وده بيكون أوقات الأعياد والحفلات وفي أجازة الصيف علشان السفر، ومن أحلامي إني أشتغل في الحسين والغردقة وشرم الشيخ وأفتح محل جاليري".

تشمل الـ "hair wraps" أربعة أشكال، الشكل الأول يتألف من لونين مختلفين، والشكل الثاني يشمل عدة ألوان مختلفة، والشكل الثالث يشبه حرف الـx، والرابع حرف الـx أيضًا ولكن بألوان كثيرة متداخلة، توضح مارينا أنها تقوم بتثبيت الـ "hair wraps" في خصلات الشعر بواسطة الخيط: "دي لما بتتفك مش بينفع البنت تستعملها تاني، لكن في حاجة مختلفة اسمها "extention"
دي بتتلف بعيد عن خصلات الشعر خالص وممكن البنت تفكها وتركبها عادي".