كشف المخرج بيتر ميمي، عن الرهبة التي شعر بها، هو والمؤلف هاني سرحان، قبل الدخول في مسلسل "الأب الروحي"، وفيلم "القرد بيتكلم".

وقال "ميمي" عبر صفحته الرسمية على موقع التواصل الاجتماعي "فيس بوك": "يعنى تفتكروا لما الشركة كلمتنا أنا وهاني سرحان، أننا نعمل مسلسل مستوحى من "الأب الروحي" مخوفناش؟!! لا طبعًا اترعبنا بس كنا واثقين في ربنا واتفقنا نعمل اللي علينا.

وأضاف: "عشان الفرق بينا وبين الناس بتاعة بره، أنهم مبيخفوش هم قرروا يعملوا ناس بتطير في سوبر مان وباتمان، وأحنا صدقنا، قرروا يعملوا أشباح وزومبي، وأحنا صدقنا، قرروا "يامريكو" فيلم السمواري السبعة وعملوا العظماء السبعة، وبعدين في الهند قرروا "يهندو" باميتاب باتشان، وبعدين أحنا قررنا "نمصره" بشمس الزناتي، ومحدش خاف والكل نجح.

وتابع: "أما "القرد بيتكلم"، طبعًا فيه من روح "NYSM" و"Dhoom3" و"Prestige"، بس مش هم طبعااااااا، زي ما "إسكندرية ليه" فيه من "روما" فيلينى، وزى ما "الإمبراطور" فيه من "scarface"، وزي ما "سلام يا صاحبي" فيه من "Borsalino"، بس مش هم طبعًا".

واستطرد "ميمي": إحنا قررنا منخافش، ونعمل حاجات مختلفة عن كل حاجه حصلت، وشكرًا أن فيه شركات إنتاج قررت متخافش، وكانت شركة فنون مصر اللي قررت تاخد حمل مسلسل باسم "الأب الروحى"، أو شركة مقام سيف عريبي، اللي قرر يعمل أكتر فيلم مجنون في الكوكب "القرد بيتكلم" وبطولة أكثر اتنين ممثلين مجانين "واكد" و"فيشاوي".

واختتم حديثه قائلًا: "السباق ابتدا، واحنا قررنا نخلع الجزم ونجري، ومش فارق معانا يقولوا الحقوا دول جاريين حافيين".