حصل حق المواطن على نص المكالمة الهاتفية لقداسة البابا تواضروس الثاني، بطريرك الأقباط الأرثوذكس، والسيدة سعاد ثابت، التي تم تجريدها من ملابسها في المنيا وسحلها في الشارع، إثر شائعة علاقة تجمع ابنها وفتاة مسلمة في قرية الكرم بالمنيا.
وكان نص المكالمة كالتالي:
البابا: أهلا بيكي يا ماما.
السيدة سعاد: أهلا بيك يا سيدنا.
البابا : ازيك.
السيدة: الحمد لله.
البابا: قلبي معاكي والعذراء تغطيكي وتحافظ عليكي.
السيدة: ربنا يخليك لينا يا سيدنا ويطول لنا في عمرك.
البابا: ربنا يحميكي دايمًا من كل شر.
السيدة: يارب يحميك أنت من كل وأي وحش يارب ويخليك لينا.
البابا: ربنا يحفظكم ويحفظ وﻻدكم كدة في خير.
السيدة: ربنا يخليك لينا يا سيادة البابا.
البابا: ربنا يقويكي ويكون وياكي ويحميكي وميخليش حاجة وحشة تحصل.
السيدة: ببركتكم أنتم كلكم.
البابا: ربنا يحفظكم دايما.
السيدة: يا رب يخليك لينا يا رب.
البابا: أي حاجة يا ست سعاد الأنبا مكاريوس قايم بكل شيء.
السيدة: ربنا يخليه لينا ويخليكم كلكم ويحافظ عليكم يا رب.
البابا: ربنا يحافظ عليكى ويحميكى.
الأنبا مكاريوس : سيدنا احنا بنتصور فيديو دلوقتي تحب تلقي أي كلمة.
البابا: ربنا يحفظ الجميع في سلام وعلاقتنا الطيبة يجب أن تستمر والموقف ده زي ما المسئولين كلهم وعدونا أنه يأخذ الاجراءات القانونية وزي ما تكلم السيد الرئيس عبد الفتاح السيسى وكل المسئولين في الدولة والمسئولين فى الأمن واخدين الموضوع بجدية بالغة علشان إعمال القانون وتنفيذ القانون أولاً وأخيراً ومحاسبة أي شخص مخطئ في القصة كلها طبعا ده في الشق الجنائي لكن في الشق الإجتماعي كل المصريين محفوظين في مصر في علاقات طيبة بين كل المسيحيين والمسلمين وأن حصل موقف وأن كان موقف مشين ومؤلم للغاية وأنا شخصيًا في رحلة العلاج الموجود فيها أعاني منه كثيرًا لكن أنا واثق أن الله يمرر كل شئ بهدوء وسلام ويحفظ السلام اللي موجود واللي عايش به كل المصريين ويحفظ مصر كلها بخير.
الأنبا مكاريوس: قداستك تحب توجه كلمة للسيدة سعاد
البابا: يا ست سعاد اللي حصل ده لا يقبله إنسان أبدًا لا جوة مصر ولا برة مصر وهو شيء مؤلم ومخزي والجميع يتأسف له لكن أحنا دايما ننظر إلى الأمام ونتذكر السيد المسيح لما تعرى أيضًا في أحداث الصلب وربنا يحفظك من كل شر وويحفظ كل الأسره وكل بيت وكل القرية ويحفظ البلد كلها في سلام والمسيح إذا كنت تألمتي آلامات شديدة المسيح يشيل كل الآلام دي سواء من حضرتك أو من كل البيت والأسره سواء الرجال أو النساء.
الأنبا مكاريوس: حاللني - أي سامحني- يا سيدنا عطلنا قداستك وتعبناك.
البابا: أنا سعيد أن يبقى فيه فرصة أن أتكلم مع الست سعاد في حضور نيافتك وطبعاً نيافتك باعتبارك الأسقف المسئول في المنيا المتحدث الرسمي عن هذا الموضوع والمفوض من الكنيسة لمتابعه اجراءات هذا الموضوع وطبعا أنا عارف ظروف نيافة الأنبا أرسانيوس مطران المنيا ربنا يشفيه، ربنا يقويك في هذه المسئولية وهذا الموضوع، وحفظ سلام المكان هناك أهل البلد الكرام والقرية اسمها أهل الكرم ويحفظ البلد وسلام المنطقة كلها وربما يكون هذا الدرس فرصة لكل المسئولين في الدولة أن يلتفوا إلى هذه المحافظة التي ﻻ يمر فتره ولا تحدث فيها أحداث مؤلمة بتتعب مصر كلها وتتشوه صوره مصر قدام العالم كله .