"بيتي خرب خلاص.. وكل حاجة ضاعت".. بصوت مبحوح يغلبه دموع الحسرة والألم، ووجه عليه ملامح الشيب والشباب، فتاة طرقت أبواب محكمة الأسرة تصرخ بشكواها: "جوزي ياحضرة القاضي.. الفيسبوك ضيعه.. فضل يجري ورا الستات والبنات.. أهملني وكل ما أكلمه وأطلب منه حاجة يهب فى وشي".

تابعت الزوجة المجروحة: ”هو أنا مش زي الستات اللي بيتكلم معاها على الفيس، كل ما أقوله كده يقولي ده شغلي، لحد ما الشيطان سيطر على دماغي وبدأت أفكر لازم أعرف بيعمل إيه مع الستات ده"، وتابعت الفتاة قائلة: "لجأت لإحدى صديقاتي وفكرنا في خطة لاستدراجه، وقامت صديقتي بعمل أكونت على الفيس بوك وغيرت صورتها بصورة أخرى لوحدة من الآخر ”موزه”، وأرسلت طلب صداقة لجوزى وعلى الفور جوزي من غير ما يفكر في مين اللى ارسل له طلب صداقة وافق وبدأ يتحدث معها على الشات".

أضافت: "تحدثت صديقتى مع زوجي كثيرا على الشات وبعد مرات عديدة من الكلام طلب منها أن ترسل له صورة، لأنه بيبحث عن عروسة.. فانهارت من البكاء.. أنا مش وحشة او ست مهملة في نفسها، عايشة معاه على الحلوة والمرة، وفى الآخر يطلع بتاع ستات وعاوز يتجوز علي"، وتابعت كانت الصدمة التي أنهت كل شيء عندما طلبته صديقتي من تلفونها وسجلت المحادثة، لم أستطع التحمل وأمسكت منها التليفون، وكلمته وعلى الفور أغلق الخط، بل عاتبني ووجدته يشتم ويقول لي أنت بتسلطى واحدة عليا أنا هخرب بيتك.. قلت له: "هو فعلا بيتى خرب".. وأنا كل ما أطلبه الحصول على الطلاق منه.