انتشر مؤخرا بين الشباب عبر صفحات مواقع التواصل الاجتماعي، خبرًا يفيد بأن الحكومة الأيسلندية، قررت منح راتب شهري تبلغ قيمته حوالي 5000 دولار، لكل مهاجر يتزوج من فتيات أيسلندا لزيادة النسل، وتوفير المورد البشري، ولكن خرج الرحالة الشهير أحمد مدحت الشهير بـ"حجاجوفيتش" ليؤكد أنه تواصل مع مسئولين في الحكومة الأيسلندية، ونفوا ذلك تماما، وأن الأمر انتشر بعض ظهور جميلات أيسلندا في مباريات اليورو، حيث استغلت بعض شركات النصب ذلك في تشجيع الشباب على السفر والنصب عليهم.

وكتبت الصفحة الرسمية لـ"حجاجوفيتش" ذلك في بيان لها: "كتير من المصريين من امبارح بينشروا علي الفيسبوك موضوع "بسبب نقص الرجال .. ايسلندا تمنح 5000 دولار شهرياً لكل مهاجر يتزوج من بنات ايسلندا لزياده النسل" و جالنا كتير من الرسائل علي الصفحة بتسألنا عن الموضوع ده".

واستكمل العاملون على صفحته: "حجاجوفيتش كلم مسئولين في حكومة ايسلندا عن الموضوع ده عشان يعرف حقيقته و الكلام اللي جاي ده مهم جداً لكل الناس المهتمة بالموضوع و قد يكون صادم للبعض بس إحنا بنقولهالكوا عشان متتجروش ورا آمال زائفة.. الكلام ده إتضح من كلام المسئولين إنه بيحصل في كل مناسبة زي موضوع روسيا من فترة لما قالوا "إتجوز روسية و خد الجنسية و ١٥ ألف دولار أمريكي هدية من الحكومة الروسية" .. و دلوقتي ايسلندا بعد ظهور جمال مشجعاتهم في ماتشات اليورو .. ف شركات النصب ديه بتستغل الكلام ده مش بس في مصر و لكن في العديد من الدول التانية كمان بأنها بتعمل مواقع علي الإنترنت "متخصصة في تسهيل الزواج من بنات ايسلندا" و حاطين الخبر بتاع المكافأه".

وأضافوا: "فالشباب حول العالم (خصوصاً في مصر) بيقعوا ضحايا لعملية النصب دي .. بإنهم بيدخلوا علي المواقع ديه و يسجلوا بيانتهم و بيخلوك تتكلم مع بنت (اكنها اللي حتتجوزها) و بتقولك عشان تبعتلك دعوة رسمية للزواج عشان تروح السفارة و تقدر تاخد فيزا و تسافرلها و تتجوزها و تاخد المكافأه الشهرية .. لازم تدفع مبلغ مالي بسيط بكارت بنكي .. المشكلة مش في كده .. المصيبة في إنك أول ما بتحط بيانات كارتك البنكي و تكتب رقمه و تاريخ إنتهائه و الرقم السري اللي علي ظهر الكارت و تبعتهلها، بيتم سرقة الفلوس اللي في حسابك و لو كارتك ".".Credit card يعني البنك بيدفعلك و بعدين إنت بتسدد للبنك بعد ٥٥ يوم، بيتم سحب كل المبلغ المتاح لك سحبه!

وختم العاملون على الصفحة بيانهم: "اللي خلانا نكتب البوست ده و نحذر الناس كلها عن الفخ ده ان فعلا المواقع ديه بتحقق ملايين الجنيهات من جيوب الناس و بعض الصفحات بتحب الزيطة فبتنزل الخبر و بتساعدهم علي عملية النصب ديه.. فرجاء من الناس كلها متدخلش حسابتها البنكية الا في المواقع المضمونة ".