كلمينــي يـا رصاصة.. كلميني وطمنيني!!
لما كنتى في قلب إبني.. إتـوجع ؟
طب كان بيبكي؟.. طب مات جدع؟
طب حس بيكى أو اتصرع.. وانتي داخله بكل قسوه تقتليه !؟
كنتي عارفة انك رايحة تحرميه!؟
من حياته ومن حياتى؟
هو كان أطيب ولادي.. كان يوماتي يبوس إيديا.. ويقرا كل اللي في عينيا
وكان بيقضي حاجاتي ليا
كنت لما يوماتي أصلي.. أدعي ليه من كل قلبي
يفضل طول حياتي سندي.. و بعد ما أموت يبقالي صدقة
بس عشت.. وهو مــاااااااات!!!
إرهابي خد عمره سرقة.. وساب بموته في قلبي حرقه
يا رصاصة.. هو انتي حالفة تختارى الشباب؟؟
و بعد موتهم برضه حالفة تسكني.. جوه قلوب الأمهات!!
كلمينى يا رصاصة.. كلميني يا رصاصة
لما كنتي في قلب إبني.. إتوجع..
طب كان بيبكي.. طب مات جدع؟؟.