انطلقت اليوم الاثنين بداية انتخابات الرئاسة المصرية 2018 وتستمر لمدة ثلاثة أيام وصولا إلى يوم الأربعاء الموافق 28 من شهر مارس الجاري، ومع انطلاق الانتخابات الرئاسية، تناولت "بوابة المواطن" إجابات بعض السيدات في نزولهم لجنة إنتخابات مصر2018 علي سؤال "نزلتي تنتخبي ليه؟ والتي جاءت متنوعة في ردودها:
"واجب وطني في المقام الأول":
عبرت أول ناخبة عن رأيها لنزولها إنتخابات الرئاسة 2018 قائلة "اكيد نزلت واجب وطني في المقام الأول، البلد دي ليها حق كبير عليه، ومفهوم الانتخابات مش مجرد إختيار رئيس، انما هي إختيار صورة كاملة للبلد قدام كل العالم، في اي وقت وتحت اي ظرف كنت هنزل انتخب، بلدي ابقي واحق".

"ما هو المشوار صعب، بس لازم يكمل":
"ما هو المشوار صعب، بس لازم يكمل"، اول عبارة نطقت بها ناخبة تقف علي صندوق الإقتراع والتي أضافت "بصي الكل عارف ان الظروف صعبة، وان ناس كتير تعبانة، بس احنا واثقين ان في ناس كتير بتعمل اللي عليها، ولو حتي المشوار صعب لازم يكمل".

"عشان ابني ده":
اجابة ناخبة علي سؤال "نزلتي انتخبتي ليه؟" قامت بالاشارة الي ابنها عمر سنتين قائلة"نزلت انتخب عشان ابني ده، عشان يتعلم بكرة حق بلده، وعشان يفهم ازاي يقف جنبها، وعشان احس اني قدرت اعمل معاه حاجة لبكرة، حتي لو هتعب شوية حق ابني اقدر اوفره".

"عشان الرئيس عمل اللي عليه":
بدأت كلامها ناخبة أخري قائلة: "نزلت أنتخب عشان رئيس عمل اللي عليه، ما هو لو بيحب البلد دي كده رغم ظروفها ورغم مشاكلها ورغم همومها، اقل واجب علينا احنا كمان نحبها، مش هينفع اقول بحبها وانا قاعدة في البيت، وماليش اي راي فيها، لازم احس اني ليه راي في البلد دي هي بتاعتي وليه حق فيها".

"عشان البلد دي تستاهل":
قالت ناخبة أخري "نزلت انتخب عشان البلد دي تستاهل كتير، تستاهل التضحية والتفكير والحب، اي كان الوضع فيها ايه هي حته مننا لازم نحبها زي ما تكون، هفضل لاخر وقت بحبها وبديها حقها، زي ما اكلت وشربت واتعلمت وعشت وكل تفاصيل حياتي فيها، تعيش مصر وتعيش كل حتة فيها".