روى شاهد عيان تفاصيل حادث قيام أمين شرطة بإطلاق الرصاص على 3 مواطنين بمنطقة الرحاب صباح اليوم الثلاثاء، مما ادى لوفاة بائع متجول وإصابة 2 من المارة بإصابات خطيرة.
وقال الشاهد لـ «حق المواطن»، أنه صباح اليوم حضر أمين شرطة وزملائه لتناول الشاى من أحد الباعة أمام البوابة رقم 6 لمدينة الرحاب بالقاهرة الجديدة، وأن أمناء الشرطة متعودين على شرب الشاي ببلاش من البائع، بالإضافة إلى فرض الإتاوات على باقى البائعين وفى حالة عدم الدفع يتم سحلهم إلى قسم الشرطة.
وأضاف الشاهد، أن البائع قال لأمين الشرطة: ياباشا والله الجو مريح وممعيش فلوس شدوا مع بعض فى الكلام ثم جاء بائع آخر وقال لأمين الشرطة ياباشا نهارك أبيض وسامحنا انهارده ، فقام الأمين بسبه وأخد السلاح اﻵلى من زميله من العربية وداس على الزناد فأصابت الرصاصات بائع الشاى وقال البائع الآخر لأمين الشرطة: إيه اللى إنت عملته دا يا ابن ... ، فرد أمين الشرطه قاله أنا ابن ... وداس على الزناد مرة تانية وكان فيه ميكروباص محمل عمال شغالين في كومباوند حياتى ريذدنس ، واقفين بيتفرجوا نزل 3 من الميكروباص بيجروا على أمين الشرطه داس تالت دوسه على الزناد أصاب الثلاثه ورمى سلاحه وجري وساب زميله في العربية.
وتابع: روحين ملهمش أي ذنب كل ذنبهم أنهم غلابة عايزين ياكلوها بالحلال، بس دا كله مش مهم المهم إن الشرطة اللى جات مفكرتش تعرف اللى حصل كل تركيزها كان على أمين الشرطة التانى اللى كان قاعد في العربية، أخدوه بالعافية من وسط الناس وجريوا على قسم أول التجمع.