لتلك الأسباب .. أمير طعيمة يطالب باستقالة أبو ريدة وكوبر
الإثنين 25/يونيو/2018 - 11:29 م
محمد سعد الدين
طباعة
عبر الشاعر أمير طعيمة عن استيائه من الأداء السئ الذي ظهر به المنتخب الوطني خلال منافسات كأس العالم، وذلك بعد خسارة المنتخب مبارياته الثلاثة.
وعلق أمير طعيمة على أداء المنتخب عبر حسابه الرسمي بموقع التواصل الاجتماعي "فيس بوك" قائلا: " كان من العدل استمرار كوبر واتحاد الكرة والمشاركة في كأس العالم لأنهم وصلوا كأس العالم بعد غياب ٢٨ سنة وده إنجاز "بالنسبة لنا للأسف" وامّم افريقيا بعد غياب ٧ سنوات ووصولهم للنهائي بغض النظر عّن الأداء".
وتابع طعيمة " ومن العدل الان استقالة أو إقالة الاتنين. ليه ؟. عدم وصولنا لدور ال ١٦ كان ممكن يكون أمر عادي بس في مجموعة غير دي، احنا ما وقعناش زي المغرب مثلا مع البرتغال بطل أوروبا وإسبانيا بطل العالم.. القدر جابلك مجموعة ما تحلمش بيها، مفيش معاك فرقة من المستوى الأول لوضع روسيا علي راس المجموعة، والمنتخب اللي طلعلك من المستوى الثاني منتخب قوي بس اهون من منتخبات كتير في نفس المستوى.. يعني بالورقة والقلم انت بتسبق منتخبين في التصنيف الدولي وصولك كأول المجموعة إنجاز نسبي ووصولك كثان نتيجة طبيعية وكنّا هنحسبهالكم إنجاز لأننا ما عملنهاش قبل كده.. انك تخرج صفر ده فشل اكبر من إنجازك بالوصول، انت ما عملتش اَي حاجة وتقريبا أسوأ أداء في ال 32 فرقة ومنهم كتير تسبقهم كتصنيف دولي.. ده مش اول صفر لهاني أبو ريدة فقد كان المسئول عن ملف تنظيم مصر لكأس العالم ٢٠١٠ وطلع بنفس النتيجة.
وأشار طعيمة: "المنظومة دي كلها لازم تتفور، ولازم مدرب وطني حافظ اللاعبين المحليين سواء حسام حسن او حسن شحاتة يعيد بناء الفريق، وده مش صعب لأنك عندك لاعبين كتير عندهم خبرة دولية وسنهم صغير يعني مش هتتضطر في الإحلال والتجديد تعتمد علي لاعب مش هتحتاجه بعد سنتين او تلاتة..استقيل يا ابو ريدة انت وكوبر ومتشكرين علي كده".
