نشر المخرج "عمرو سلامة" على صفحته الرسمية عبر موقع التواصل الاجتماعي الشهير "فيس بوك"، بوستر مشروعه السنيمائي الجديد "الشيخ جاكسون"، بمناسبة البدء في تنفيذه.

قائلا:" أنا بحب المشاريع -أفلام أو غيرها- اللي بتوصلك إنك بتنام بتحلم بيها، بتخاف تموت قبل ما تخلصها، بتقتنع إن ما فيش حد في الدنيا ها يحكيها زيك، بتخلي عندك هدف في الحياة تصحى علشانه، بتحبها كإنها إبنك أو بنتك، بتبقى خايف من اليوم اللي هاتطلع فيه للنور وتديها للناس وماتعرفش تعدل فيها أو تشتغل عليها ثاني وتستسلم لسنة الحياة وتبدأ تحب مشروع جديد".

وواصل سلامة: "مش لازم مشروعك يغير الكون أو المجتمع، لإن في الحقيقة ده دور أكبر من دور الفنان لوحده، ممكن يكون بيتكلم بس عن جرح عيشته، أو بيطرح جدل يحرك حاجة، أو بيعبر عن فكرة جاتلك وإنت بتستحمى أو حتى في تحدي تقني نفسك تعرف تنجزه وتنجح فيه وتتعلم حاجة جديدة تطورك وأقدر أقول إني دلوقتي بعمل مشروع فيه كل العوامل ديه، وحتى المشاريع اللي في خطتي أعملها بعده متأكد إن فيها العوامل اللي بتصحيني وتحسسني إني عايش، وحاسس إني محظوظ إني عندي كثير عايز أحكيه وأسأله وأصرخه وأقوله وكمان فوق كل ده أمتع الناس بيه".

وقال سلامة في نهاية كلامه:"إنتظروا "الشيخ جاكسون" فيلمي القادم لو كان ليا عمر، لإن أنا شخصيا بعد اللحظات اللي أشوفه على الشاشة، لإن نفسي جدا أعمله، علشان نفسي جدا.. أتفرج عليه".