قالها الفنانة سماح أنور في برنامج تحيا الستات الذي تقدمه الإعلامية راغدة شلهوب على فضائية النهار بأنها غير فخورة كونها خلقت انثى لما تتعرض له الفتاة من ولادتها.

سماح أنور في تحيا الستات
وقالت سماح أنور في تحيا الستات: «أنا محستش أن دة ضغط ، عمري ما حسيت إن في حاجة متاخدة مني مكنتش بروح أعياد ميلاد، مكنش ليا صداقات حقيقية أيام المدرسة لأن مبروحش لحد ولا حد بيجيلي ممنوع تروحي تذاكري عند حد، الكلام ده ممنوع خالص مكنتش شايفة إن دة مش طبيعي ومكنش عندي فكرة إن في حاجة تانية غير كده ولا كنت في الفصل احكي والبنات كانو بيتلموا ويحكوا حياتهم العاطفية، أنا ببقى في حتة تانية خالص أنا بنزل الفسحة ألعب كورة».

وأضافت: «أنا دماغ تانية خالص الواحد مبيفتقدش الشيء اللي ميعرفوش فأنا مكنتش شايفة ان في حاجة غلط بالعكس كنت شايفة انها حياة لطيفة جدًا ومليانة وورايا مليون حاجة اعملها، وأول مرة لما حبيت الأستاذ بتاعي بتاع الجغرافيا ده كان في المدرسة كنت ابتديت احس ان قلبي ابتدا يدق واغير حاجات، مثلًا يونيفورم المدرسة عايزة احطله حزام وبدل الجزمة والشراب اجرب البس جزمة بكعب».



وأشارت سماح أنور في تحيا الستات :«عايزة اعمل شعري مش عايزة اغسل شعري وألمه مثلًا حاجات من النوع ده، وبقيت عايزة استمتع بإني ابقى احلى شوية، شكلي يبقى ملفت شوية ودي أول حاجة حسيت فيها ان انا اكتر من اللي انا عايشاه، وكل ما تنضجي وتكبري وتدخلي علاقات جاده شوية بتتعرفي على الأنثى اللي جواكي، وبالنسبالي كست بعرف الست اللي جوايا لما ببقى بحب والراجل هو اللي بيخليني احس بأنوثتي».

أمنية سماح أنور في تحيا الستات : كان نفسي أبقى ولد
كما كشفت عن أمنيتها في أن تصبح رجل قائلة :« ياما اتمنيت اكون ولد بس مش علشان بكره اكون ست لكن كنت دايما بشوف الستات في مجتمعاتنا بيتبصلهم بطريقة بتضايقني التعامل معاها مكنش لذيذ مفيش عدل ليها كبني أدم، مجرد انها ست مستباحة، مجرد انها ست تبقى تابع ودة كلام كله مغلوط دي أخطاء شائعة فخليتني من صغري حابه انه ليه يا رب مخلقتنيش راجل وكنت هبقى حرة اكتر والست تبقى نفسها حاجة لمجتمعاتنا غريبة شوية، حصلي لما ابتديت اشتغل وقالو دي مسترجلة انا كنت بكره اوري انوثتي ان انا ست اكتر في تعاملاتي كنت بحس ان ده شىء مهين بالنسبالي بسبب تعامل المجتمع مع الست، مكنتش فخورة اوي ان انا طلعت انثى».

اقرأ أيضا: فيديو| سماح أنور في تحيا الستات: هذه رسالتي لكل رجل في العالم