الفن في مصر ما بين الشللية والوسائط، ولكن هناك من يقدر الفن والفنانين بحق ولا يهتمون بشيء سوى الممثل الحقيقي و الموهبة الفريدة، وهناك الكثير والكثير من المواهب التي تستحق من ينظر إليها و للأسف من يهتمون بالممثل قلائل و من يهتمون بالوساطة أكثر .

الواسطة تقتل المواهب

و من حديثنا مع أحد الفنانين الصاعدين، والذين يسعون بحق منذ سنوات ، وإلى الآن لم يجد فرصته الحقيقية و في تصريحات خاصة لـ"لمواطن الإخباري"  الفنان "رامي عبد المقصود" يقص علينا حكايتة ومشواره الصعب، والذي يمر به أغلب الفنانين الصاعدين وموهوبين مصر، فدعونا نتعرف علية سويًا.

من هو رامي عبد المقصود؟

"اسمي رامي عبد المقصود ، تخرجت في  كلية  الحقوق جامعة عين شمس .

كيف كانت البدايات مع التمثيل ؟

بدأت التمثيل وأنا ٣ ابتدائي وصولًا لمسرح المدرسه وأنا في ثانوي لحد ما قرروا يقلبو مسرح المدرسه لكانتين،  وصبرت لحد ما إتفرجت في مرة على أستاذ محمود ياسين في وبرنامج بيقول إنه خريج حقوق عين شمس، وأنه كان في فريق تمثيل الجامعه وأد إيه فرق الجامعه ومسرح الجامعه حاجه كبيرة وعظيمه ، وقتها كنت بحب أتفرج علي مسرح كتير جدا جدا وأنزل أجر شرائط الفيديو علشان أتفرج وأضحك.

وأضاف:" وكنت في الوقت ده خلصت ثانويه عامة مستني النتيجة، ومكنتش أعرف إن في حاجه اسمها معهد الفنون المسرحية، عرفت بس إن في حاجه إسمها آداب مسرح ولما طلعت النتيجه والدي عارض دخولي آداب مسرح وقالي إدخل أي كلية عشان يبقي معاك شهادة وبعد كده إعمل إلى إنت عاوزه وقتها كنت مضايق جدا ".

وأردف:" كانت شايف إنها ديكتاتورية منه لحد ما كبرت وعرفت أنه كان عنده حق، دخلت حقوق لاني كنت بحبها رغم إن مجموعي كان كبير وفي أول يوم دراسة ف حقوق عين شمس طلعت فريق التمثيل ومنزلتش منه إلا لما اتخرجت، إتعلمت جوا المكان ده يعني إيه كل حاجه في الحياه إزاي أمثل إزاي أتعامل مع الناس إزاي أستمتع بكل حاجه بعملها".

ما الذي أضافه المسرح الجامعي لك ؟ 

 يقول:" رامي عبد المقصود" فريق التمثيل أثر في شخصيتي جدا ومن أول مسرحية أخدت دور لحد ما كنت بعد سنتين باخد كممثل مساحات كبيرة، كنت بحب أعمل كل حاجه بشكل مختلف أخفقت كتير ونجحت شويه لكن محدش بيتعلم ببلاش فاتعلمت كتير جدا على المستوى الفني والإنساني وفي فترة الجامعه كنت بعمل كل حاجه عشان أبقي بعمل مسرح كتير فكنت بشتغل في عروض بره الجامعة كتير واي مهرجان حر جوا الجامعة كنت بمثل في كل عروضه بس كنت بقدم معظم أدواري جاده مفيهاش كوميديا إلا نادرا.

 

ما هي نقطة التحول في حياتك التمثيلية وماذا تفضل التمثيل الكوميدي أم التراجيدي ؟

 نقطة التحول بالنسبالي كانت بعد التخرج وكأن الجامعة كانت دراسة وتأهيل وتعليم، إنطلقت بعد الجامعة مع صحابي من خريجين الكلية في فرق خاصة وفكيت بقي، لقتني بعرف أمثل كوميدي كويس زي التراجيدي لحد ما خدت فرصه فالتانية فالتالته فيعتبر فكيت لما إتخرجت وبعدت شويه عن الكلاسيكيات الي كنا متعودين نقدمها في الجامعه، وده كان حاجه حلوة ليا وحشة، لأن في الجامعه مكنش في قوالب ثابته أو تصنيف ككوميديان أو تراحيديان، كنا بنتعلم اني ممثل والممثل يقدر يعمل الاتنين، وإتخرجت وإتصدمت من الواقع، الوصول لحلمك مش بسهوله خالص أنا بمثل من سنة ٢٠٠٢ بداية بس من مسرح الجامعه.

 

هل مكاتب الكاستنج أتاحت لك فرصة للعمل؟

عمري ما روحت (مكتب كاستنج) وإشتغلت مكنش على أيامي ساعتها حاجه إسمها كاستنج (دايركتور) كنت بتروح بصوره مكتوب ف ضهرها إسمك ونسيبها ف المكاتب ونمشي، طيب أعمل إيه ولازم يكون معاك حتي فلوس للسعي علي فكره كل ده و والدي مكنش يعرف إني بمثل، عرف قبل ما أتخرج بتيرم واحد.

 

أين درست فن التمثيل الإحترافي؟

 وأنا في الجامعة باب التقديم للمعهد العالي للفنون المسرحية فتح قدمت وسقطت وبعد كده سمعت عن مكان إسمه مركز الإبداع الفني حضرت فيه كل العروض اللي إتقدمت زي عرض هبوط اضطراري، ايامنا الحلوه، خمس رؤي للير، قهوة سادة، عشقت المكان ده، قررت أقدم قدمت ونجحت في التصفيه الأولي وسقطت في التانيه، مايأستش فتح في جامعة عين شمس قسم دراما ونقد قدمت ونجحت ودخلت، ولإني كنت عايش لوحدي معظم حياتي ومن أيام الجامعه قررت أنزل أشتغل أهو يبقي معايا فلوس أعيش وأعرف أسعي ورا حلمي لحد ما قررت أشتغل محامي، المهنة الي بحبها جنب الفن الي بعشقه وبقيت محامي الصبح وممثل بالليل، وفي ٢٠١١ دخلت مهرجان المركز الثقافي الفرنسي وأخدت جائزة أحسن ممثل في المهرجان وسافرت مهرجان أفنيو في فرنسا هنا نقطة تحول تانيه شفت فيها تجارب كتير قوي غيرتني ورجعت مصر إنصدمت.

 

لماذا انصدمت بالواقع وأنت تقول أنك حققت أشياء ملموسة على أرض الواقع؟

انصدمت بحاجات كثيرة لصعوبة الوصول للهدف بتاعي لإني لاخريج معهد ولاخريج مركز الإبداع ولا خريج أداب مسرح، كان سني شويه كبر وقررت أتجوز وبعدت عن الفن نهائيا لمدة أربع سنين عشان البيت والأسرة والإستقرار، في الفترة دي قررت أكتب لإني مش قادر أوصل وعشان معنديش مجال لاي يأس قلت يمكن الكتابه تكون باب للوصول.

وأضاف:" قرر أرجع أمثل تاني وكانت تجربتي بمونو دراما حال الدنيا كانت تخليني مهما بعدت أول ما الاقي مهرجان مونو دراما أدخله وأخد كمان جايزته لحد ما جاتلي تجربه مسرح دوله وش الخير السيرة الهلامية وارجع تاني بعد سنين تغيرات علي مستوي التمثيل ، ورجعت أبقي محامي الصبح مطحون في المحاكم ومكاتب المحاماه، وفي الليل ممثل في البروفات منا لازم أشتغل عندي بيت وأسره، وكنت دائما أدعي ربنا يكتبلي نصيب في عمل فني يكون فاتحة خيرعليا".

 

كيف تغلبت على هذة الصدمة؟

 ربنا من كرمه أكرمني بحاجه تفوق توقعاتي ودعايا، فيحصل أن وزارة الثقافة تقرر تخلي عروضها تروح جامعات مصر عشان تعرض لجمهور الجامعه الجميل فيحصل أن ألاقي نفسي بعرض قدام معالي وزيرة الثقافة إيناس عبد الدايم ورئيس قطاع شئون الإنتاج الثقافي الأستاذ خالد جلال، مش مصدق ده الاستاذ اول مره يشوفني ، يارب يفتكرني علشان لما اقدم يبقي عارفني علي الاقل لأن الحمد لله ربنا كان كارمني في عرض السيرة الهلامية قوي ، بعد العرض لقيت الأستاذ عازم كاست العرض كله علي مسرحية سلم نفسك في مركز الإبداع الفني وكرمنا بعد العرض وقدمنا كلنا في المركز وإسبوعين مكالمة تليفون ألف مبروك تم قبولك كطالب في مركز الابداع الفني! إيه ده أنا قعدت علي كرسي المركز كطالب عند الاستاذ خالد جلال.

 

ماذا تعلمت خلال دراستك الاحترافية فية المخرج خالد جلال؟

 اتعلمت بجد يعني إيه ممثل يعرف يعمل كل حاجة، فجأه الأستاذ يكون ورشة كتابه ويختارني ضمن قوام الورشه ، فجأه ألاقي إستحسان وتشجيع غير عادي منه كمؤلف فأنول شرف وجودي ضمن ورشة كتابة مسلسل مع بعض ، جوا الورشة إتعلمت كتير وإتمرنت كتير لكن يبقي التمرين المحبب إلي قلبي و اللي حسيت فيه اد إيه فكرتي بتنضج وهي ازاي ابقي مختلف ، كان التمرين احكي عن نفسك في إطار فني ، وفعلا ربنا كرمني لما لقيت إستحسان وتشجيع من زمايلي ومن أستاذي خالد جلال لما حكيت كل حاجه عن نفسي من غير ما اقول ولا كلمه ! ولقيت نفسي باتخرج في عرض سينما مصر وهنا الأستاذ خالد جلال كان بيعزم كل ومعظم نجوم ومنتجي مصر وصحف مصر يتفرجو علينا.

بماذا تحارب حالات الإحباط التي من الممكن أن تلحق بك؟

 السعي ثم السعي وعدم اليأس دول من مقويات حياتي لاني مؤمن جدا بمقولة لكل مجتهد نصيب ، اه كان بيجيلي قبل وأثناء الدراسه في المركز حاجات صغيره ، لكن لما كان بيتعرف إني خريج مركز الابداع الفني كان حاجه تانيه.

 

بعد دراستك في مركز الإبداع الفني هل وجدت الفرصة من خلال مكاتب الكاستنج ؟

 عمري ما اشتغلت عن طريق مكاتب كاستنج أو عن طريق كاستنج دايركتور، كان لازم حد أعرفه لأن مش سهل أبدا تلاقي مكتب كاستنج دايركتو رشحك كده منه لنفسه ، مش عارف ليه ، إلا أن بدأت اشتغل عن طريق عرض سينما مصر منها المخرج الكبير سامح عبد العزيز اللي رشحني من مشهد صامت في سينما مصر لدور في فيلم تماسيح النيل وبعدها مسلسل انا وهي ، وكنت من ضمن السعي طلبت من صديقي الفنان أحمد شاهين إني أنزل أجرب الإعلانات ، ربنا كرمني في إعلان بالصدفه للمخرج تامر مهدي وهنا كانت نقطه تحول إن وشي يظهر في إعلان أنا فيه ممثل رئيسي ، وتوالت بقي الإعلانات لحد ما وصلت لتقريبا عشر إعلانات ، كنت شايفها سكه إن وشي شويه يتعرف ، لكن حبي للتمثيل الدرامي هو الهدف.

 

وبعد كل هذا المجهود ماذا حققت للوصول لفرصة حقيقية ؟

مش سهل توصل لمخرج أو لكاستنح دايركتور مهم بسهولة ، مع إني خريج مركز الإبداع الفني لكن دائما إلى بيعرف إني خريج مركز الإبداع الفني بيبقي عارف إن أصلا طالما أستاذ خالد جلال قبله يبقي أكيد ممثل كويس ، لكن في ظل قلة عدد الأعمال الدرامية مكانش ده ليه تأثير ، لحد ما بدأ شغل المنصات ، وفضلت أجتهد وأكلم الي يعرفوني لما بعرف أنهم داخلين حاجه لحد ما جاتلي فرصه من الاستاذ محمد خيري والاستاذ احمد الجندي ورشحوني في الكبير قوي ، كنت رايح على مشهد بس ، لحد ما شافني أستاذ أحمد مكي وطلب أننا نعمل مشهد سوا و علي  الهوا وسبحان الله الحلقة تبقي ترند والاقي نفسي نازل ضيف شرف في المسلسل ، وبعدها جالي أول دور أحس إني بمثل وكان ترشيح من الأستاذ المخرج وائل فرج الي بقول أنه من أفضل المخرجين الي إشتغلت معاهم لأن إختياره ليا ولزمايلي بأوديشن بيعمله بنفسه وأخدت الدور بناءا علي أوديشن عادل جدا.

 

ما هي الأسباب التي تعطلك عن الوصول لشغفك؟

 أكتر أسباب إلى  شايفاها معطلاني هي أن مفيش أوديشن عادل ، قليل اللي بينزل بنفسه كده يتفرج ويختار من الممثلين زي أستاذ احمد الجندي وأستاذ أحمد مكي ، أنا من كتر سعيي أي مكتب كاستنج بينزل إعلان تحضير لأي مسلسل والله ببعت زي الناس لكن عمري ما إشتغلت عن طريق ايميل او واتس تصدق! ، ولازلت ببعت لكل الكاستنج دايركتور وميأستش ومش هيأس أبدا.

 

هل تنظر إلى نفسك بعين الشفقة على أنك مظلوم وما رأيك عن الورش الفنية التي تقام في الأونة الأخيرة؟

 فكرة الظلم موجوده عموما لكن مش فكرة إني أنا اللي مظلوم هو كلنا مظلومين يعني أنا مش لازم أخد ورشة بكام ألف جنيه عشان أشتغل لإن في مكاتب كده أصله ميصحش أبقي خريج مركز الابداع الفني ورشة بيحاضر فيها الاستاذ خالد جلال واروح ورش تاني وككتير من زمايلي خريجين المعهد و أداب مسرح بيعانو كذلك، الفكرة في الاوديشن العادل ويبعدو عن الشللية وإنك تشغل الي انت عارفه وبس ده مش صح ومش منطقي كمان معظمهم مابيقدروش ان الأستاذ الممثل الي بيكلمك أو بيبعتلك أو بيجيلك مكتبك ده جزء من سعيه مش جاي يضايقك أو حاجه ده شغلته كده ودي طريقة سعيه.

 

مَن من المخرجين تحب أن تعمل معهم وماذا تفضل في التمثيل الكوميديا أم التراجيديا و ماذا تكرة في هذا المجال؟

 نفسي أمثل مع كل مخرجين مصر أكيد بس في أساتذة نفسي أمثل معاهم زي أستاذ مروان حامد ونفسي أشتغل تاني كتير مع الأساتذة أحمد الجندي وسامح عبد العزيز ، أنا ممثل بعرف أشتغل الكوميدي والتراجيدي و أصلا أنا في ازمه إن في الميديا محدش لسه جربني كممثل مش بس ككوميديان ، التمثيل موهبة في الأساس وممكن تتدرسها لكن العكس مش صحيح من وجهة نظري اما اكتر حاجه مبحبهاش ف العموم مش في الفن بس هي الواسطه.

وكانت هذة قصة معاناة شاب طموح يسعى لتحقيق احلامة بعيدا عن اي معوقات مثلة مثل الكثير و الكثير من الشباب الواعد الذين يتمنون ولو فرصة صغيرة يفرحون بها قلوبهم و قلوب ذويهم. 

ومن بعض أعمال الفنان الشاب "رامي عبدالمقصود"

مسلسلات :

 الكبير قوي ٦ ، انا وهي ، الوضع مستقر ،  الفرح فرحنا ، الواد سيد الشحات، نيللي وشيريهان، راجل وست ستات،. المواطن اكس، قلوب , الحرير المخملي

  سينما

تماسيح النيل

إعلانات

بنك مصر ، فودافون كاش، باي موب  ،  منصة مصر الرقمية ، باي موب ابليكيشن ، روابي، مايغلاش عليك، فاليو، لبان ماربيلا، جبنه طعمه، برومو برنامج يلا نتعشى

المسرح

سلام مربع مع محمد هنيدي

سينما مصر مركز الإبداع الفني

 السيرة الهلامية

حال الدنيا مونودراما بالقاهرة وفرنسا والمغرب والسودان

دنيا اراجوزات مسرح الفن جلال الشرقاوي

 والعديد من العروض المسرحية بمسرح حقوق عين شمس

البرامج

ما وراء البرنامج

التأليف

المشاركة في تأليف مسلسل مع بعض رمضان ٢٠٢١