«مستنقع منتصف النيلة».. دعاء فاروق تهاجم مسلسل أزمة منتصف العمر

الأحد 19/فبراير/2023 - 04:26 م

دعاء فاروق

منة الله نجاح

عبرت الإعلامية دعاء فاروق عن رأيها في مسلسل أزمة منتصف العمر، بكتابة منشور عبر حسابها الشخصي «فيسبوك»، قائلة: «مستنقع منتصف النيلة».

وقالت دعاء فاروق عبر «فيسبوك»: «طيب يا جماعة حد مستني النهاية، في سواد منتصف النيلة المستنقع اللي بنتابعه، انا بالنسبة لي وبالاصألة عن نفسي كدة جاب الناهية خلاص، فاضل تلات حلقات او حتى عشرة دي كلها شكليات، المسلسل خلص والستاير السودا نزلت، موتتوا بصيص الفرحة الوحيد و قتلتوا سرسوب أي أمل كنا مستنيينه يظهر».

رأي دعاء فاروق عن أزمة منتصف العمر

وأضافت: «حد يفكرني كدة، هو كريم فهمي كان زعلان إن الناس متضايقة من الاحداث الكحلي اللي بتحصل وبيقول علينا لمؤاخدة لجان !!!، ألا هو انت يا كريم كنت عاوزنا نتابع المسلسل ونفرح ؟؟؟، هل كنت مستني الناس تتبسط بالاحداث مثلا ؟؟؟».

واستكملت: «لا بص يا كريم غالبا حصل عندك لبس في الموضوع، انت المفروض تتبسط اننا بنتابع، وتفرح اننا بنتفرج وكفى، وده قمة النجاح اللي يلزم أبطال العمل إن المسلسل متشاف وشكرا، تمثيلكم كلكم رائع وشكرا، ومحدش قال انكم مش بتمثلوا هايل كلكم بتلعبوا في الاهلي يا سيدى، وبعد الحلقة الـ 12 اللي بليتونا بيها انت وريهام ورنا رئيس ورشدى المهدى وعمر السعيد تقدروا تحترفوا في ليفربوول بجدارة، إنما مفهمتش هل انت كنت عاوز الناس تشكر في الأفعال غير المبررة اللي بتعملها الشخصيات الحزينة دي؟؟؟ منين جبتوا الثقة دىي مفهمتش حتى لو موجودة في الدنيا.. حد قالك ان احنا بنسقف لهم ؟؟!!!».

دعاء فاروق تهاجم صناع أزمة منتصف العمر

وتطرقت خلال المنشور، لواقعة فتاة بورسعيد، التي قتلت والدتها برفقة صديقها، وذكرت خلال حديثها حادثة نيرة أشرف:«حد كان فرح لما الواد قتل نيرة اشرف ؟؟؟ ماحنا عارفين والله العظيم ان المجتمع فيه أمراض نفسية، وأفعال كتير غير مبررة والدراما ممكن تنقل ده، بس لما نتفرج على الأفعال المريضة اللي وراها أمراض نفسية، متلتلة».

وتابعت:« لازم الناس تستنكر وتضايق وتكتب وترفض وتشجب وتنتصر للافعال السوية وللناس الاسوياء، كريم اتضايق جدا ان بعض الناس قالوا ان فيه زنا محارم، وهما لسه مشافوش المسلسل لآخره، طيب احنا اسفين يا كريم طلع زنا بس المفروض الناس تسقف يعني للعلاقة غير السوية اللي بين فيروز وعمر ؟!!!!».

وعلقت على استنكار البعض، على شخصية كريم فهمي في المسلسل، وقالت اتركوا الناس تعبر عن رأيها في المسلسل، ومدى سوء تصرفاته غير المبررة، لأنه من الطبيعي أن يرفض المجتمع، مثل تلك التصرفات غير السوية.

أزمة منتصف العمر

وتابعت:«خدوا انتو النجاح وسيبونا نعبر عن النكد والسواد اللي اتسببتوا فيه، اتبسطوا بالترندات والبوستات والمقالات والفيديوهات حتي لو بتشتم في الأشخاص والأفعال لأنهم لازم يتشتموا كلهم ولا تحبوا بالمرة نسقف لسلمي المدمنة ونزرغط لياسمين اللي ماشية تصطاد رجالة كبار، سيبونا بقي في الوحلة اللي وحلتونا فيها مش عارفين نخرج من # مستنقع منتصف النيلة».