حلت الفنانة لوسي ضيفة في برنامج العرافة مع الإعلامية بسمة وهبة، عبر قناة المحور، وتحدثت عن طبيعة عملها كراقصة وانها لا تخاف من أن تموت وهي مرتدية بدلة الرقص، وكشفت كواليس عملها كراقصة من سن 11 عام.

قالت الفنانة لوسي خلال اللقاء: "بعمل حاجة الدنيا كلها شايفاها، بعمل حاجة في العلانية، زي ما الدكتور بيلبس البالطو بتاعه والكناس بيلبس لبسه، إحنا بنشتغل مهنة في النور، أنا مش بقدم بجاحة، ولكن فن ورقص، بلدي معترفة بي، والرقص مرسوم على جدران قدمائنا المصريين، نصيبي كده ومكتوب على جبيني إني هبقى رقاصة وأشتغل في الأفراح الشعبية لحد ما أكبر شوية وأبقى كومبارس وممثلة ونجمة وبطلة ومشهورة".

وأضافت: "مش ندمانة على عملي فى الفن ورقصت وأنا عندي 11 سنة عشان كان عندي ظروف ولازم اجيب فلوس عشان اسرتي تاكل وكنت سعيدة بعملي وأنا بحب الفن والرقص والتمثيل".

وقالت لوسي أن نجلها فتحي يتعامل مع الرقص بمبدأ أنه فن محترم، قائلة: "بيقولي هزي كويس، وده معناه إنك لما تشتغلي أي حاجة بتركيز وجد، عشان تنجحي، وتربية فتحي وثقافته بالفن عارف أن الفن محترم، ولما قالي هزي كويس، تعبيره أني أشتغل بتركيز وجدية وبذمة عشان أنجح، فتحي بيحب الهزار".

وتابعت: "فتحي ثقافة مختلفة وتربية مختلفة وبيلعب مزيكا، وطالما فكرتي تخلفي يا تربيه كويس وبما يرضي ربنا يا مجيبش أطفال".

واستكملت: "ابني مصري ابن مصرية جدعة، فتحي بيحط علم مصر على ظهره وينتخب رئيس الجمهورية، أنجبته في أمريكا لأن أمي ماتت ومات توأم لي في بطني بمصر، كنت بروح للدكتور ميعرفش إني حامل في توأم وإنهم ميتين بقالهم أسبوعين وكنت بموت وعملت عملية واكتشفت إن في جسمي سم، وحزنت عليهم، ولما توفت أمي بحثت على أم لي، فذهبت إلى أمريكا حيث كانت توجد أختي".