قلنا إن وراء الفكرة عدة أشخاص، هو أحدهم، أو ربما يمكن أن تقول أنه هو أولهم، بحكم السن أو بحكم الأقدمية أو بحكم أنه كابتن سيف قائد الفكرة وقائد كل اللاعبين مهما اختلفت ألوان القمصان.

يبقى سيف سلامة هو القائد، بالقول والفعل، أطلقوا عليه كاسياس مصر، قالوا عنه هو أفضل قائد من الممكن أن تتعامل معه، الجميع يتحدث عنه كما لو أن دوري الساق الواحدة يعني سيف وسيف يعني دوري الساق الواحدة، باختصار نحن أمام بابا المجال.

- هدفنا دايمًا هو المكسب، إحنا متعودين على الروح دي من أيام منتخب مصر وقبلها، متعودين على الضغوطات وعندنا الخبرات اللي تساعدنا نستمر وننجح.

- إحنا 15 مليون شخص في مصر من ذوي القدرات، هنقول منهم 20 ألف مبتورين "ذو ساق واحدة أو ذراع واحد"، عشان نقدر نغطي العدد ده، محتاجين أندية كتير تكون معانا.

- ممتنين لإدارة بيراميدز جدًا وبنشكرها على كل حاجة، خلينا نتكلم بشفافية، قصة إنك تروح لإدارة نادي وتقولهم أنا مبتور وعايز ألعب كورة ده ضرب من الجنان، ودي واحدة من أكبر المشاكل اللي واجهتنا، لكن لما خبطنا الباب في بيراميدز والمقاولون العرب الناس مترددوش لحظة إنهم يوافقوا على الفكرة ويشتغلوا معانا ويسخروا لنا كل الإمكانيات المتاحة، وبالمناسبة دي حابب أوجه خالص الشكر للكابتن سامي أباظة اللي أشرف على الملف كاملًا، اشتغل معانا بمنتهى القوة وقال لنا إحنا في ضهركم ومؤمنين بفكرتكم ومعاكم ووراكم لحد ما الموضوع يظهر للنور.

- الناس أخدت الملف ودرست الموضوع بشكل جيد جدًا واكتشفت إن كلامنا صح وإن الفكرة مكسرة الدنيا في أوروبا، الدنيا هناك فيها دوري أبطال، فيها مانشستر سيتي وباريس سان جيرمان وروما وكتير من الأندية الكبيرة.

وهو ده الهدف من الكلام، إنك لما تيجي تعرض فكرة نجاحها يعتمد على شقين، طريقة عرضك ليها وطريقة فهم المسئول لها وعقليته وهل يقدر يساعد في تنفيذها وانتشارها ولا لأ؟، فيه ناس كتير بتفكر في دايرة مقفولة، وعشان كده هما فاشلين، على العكس، لما روحنا لإدارة بيراميدز لقينا تعاون كبير، لقينا نظام احترافي 100 % ، لقينا ناس واقفة ورانا وبتشجعنا.

- النهارده مبنقولش أيه اللي مفروض يحصل، إحنا بنقول أيه اللي لازم يحصل؟، إنت النهارده المغرب عندها 11 فريق، تنزانيا 8 فرق، غانا 7 فرق ، فلسطين عندها 6 جمعيات، فين مصر ؟، مصر اللي فيها الأهلي والزمالك وبيراميدز والمحلة وغيرها من الأندية الكبيرة والجماهيرية.

- عندي سؤال مهم ومُلح، أيه اللي مانع الأهلي يعمل فريق؟، ليه الأهلي أصلًا قافل الموضوع؟، أيه الأسباب؟، تعالى نتكلم بشفافية تاني، بس مش هتكلم كسيف لاعب بيراميدز، لأ هتكلم كسيف شخص من ذوي القدرات.

وأنا من خلالكم بوجه سؤالي لإدارة النادي الأهلي، إنتم قافلين الموضوع ليه؟، أنا روحت قدمت الملف للإدارة، فكان الرد إحنا مش شغالين ألعاب ذوي القدرات؟، هل ده من الإدارة أو ده نظام النادي الأهلي؟، أصل هقولك على حاجة استحالة صالح سليم لو عايش كان قال لأ، عشان كده أنا كسيف شايف إن فيه مشكلة في الإدارة عند الأهلي، لمجرد إن هو يقولك لأ أنا مش بنشتغل ألعاب ذوي القدرات، ليه عايزين نفهم؟، مش ده نادي والمفروض إن فيه كل الألعاب الرياضية.

- هل إنت لو عايز تلعب كورة وهتقدم ملف لإدارة نادي، تيجي تلاقيه بيقولك لأ مش بنشتغل، زي ما تروح تقول لحد عايزين نلعب كورة، فيكون الرد السخيف إنت هتلعب إزاي، يا عم ده مش موضوعك، إنت وفر الإمكانيات وأنا هوريك بلعب إزاي، فالموضوع محتاج نقول أيه لازم يحصل كأمر واقع بعد خطوة الدوري، هنزود عدد الفرق، واللي حابب يكون موجود هيشرفنا ويزودنا.

- الزمالك نادي كبير، المقاولون العرب تاريخ كبير، بيراميدز مشروع ناجح بقاله 4 أو 5 سنين وإحنا بنكمل ده وبنزوده، إحنا بنقول إننا موجودين، بيراميدز هتكسب الدوري إن شاء الله بالعلامة الكاملة أيا كان اسم المنافس اللي بيلعب معانا، إحنا قد أي منافس وبنرحب بالكل.

- إحنا دايمًا جاهزين ومذاكرين وبنتفرج على لاعبي الفرق التانية، الفرق ما بين الخامة اللي عندي والخامة اللي عند أي حد تاني، إن أنا كبيراميدز لما جيت اختار ماخدتش ملعب صغير زي اللي بنلعب عليه، أنا طلبت من الإدارة إنها توفر ملعب كبير، قالتلي خلاص اختار المكان اللي إنت عايزه، كمان لما جيت اشتغل قولت لهم أنا عندي مدير فني بيشتغل معايا بقاله 4 شهور قالولي كمل معاه، الإدارة هي اللي بتساعدك بالإمكانيات وإنت بتنفذ أفكارك، طبعًا شغلنا على الملعب الكبير وإحنا معانا مدرب خبرة زي كابتن محمد رستم واللي بالمناسبة له باع كبير أوي في الكورة كلاعب وكمدرب فادنا وبيفيدنا جدًا، وهو ده الفرق بيننا وبين أي نادي تاني.

- لما بدأنا شغل، طلب مني كابتن رستم طريقة التعامل مع اللاعبين، قولتله هنشتغل تمارين زي العاديين وجرب وشوف كل حاجة بنفسك عشان تعرف تقيم كل واحد، وحصل، والراجل حط أيده على كل شيء، عشان كده سمعته بيقولك إنه عمره ما حس إن معاه لاعيبة مختلفة، والحمد لله كنت واثق في اختياري وفي نجاح كابتن رستم، وعشان كده هتشوف حالة الود والحب اللي بتجمعنا عشان الكل عايز ينجح عشان نفسنا والنادي.

 

- الجماهير دي هي أحلى حاجة حصلت، وبتأكد إننا ماشيين في طريقنا صح، عشان إحنا بنقدم رسالتين ، الأولى هي رسالة لواحد فاقد للأمل، إحنا بقى بنقوله الدنيا 3 حروف أ ل م عايز تشوفهم أمل ولا تشوفهم ألم، إنت اللي بتختار، من 30 سنة كنت ممكن أقولك آه يحصل، لكن دلوقتي عقليات الناس اتغيرت، أنا مستخبتش زمان وقررت أواجه يمكن ربنا يجعلني سبب طاقة نور تتفتح في وجه ناس كتير، والحمد لله قدرت أعمل ده في مجالات كتير.

- أنا اتمرمطت زي ما بيقولوا، عشان كده متأكد إننا هنوصل ونحقق أحلامنا وحالة الحب اللي إنت شايفها بتقول حاجات كتير، إحنا ومعانا الجمهور بنقول للناس اللي شايفة إن دورها انتهى في الحياة تعالى مارس رياضة وعيش وأدي أمل لغيرك.

- تعالى كده نرجع 3 أو 4 سنين، كان ينفع تشوف واحد بيلعب كورة برجل واحدة وعكازين، لو كنت قولتلك كده كنت هتقولي ده ضرب من الخيال، الحلم بقى حقيقة ومصر هتنظم كأس أمم إفريقيا في شهر نوفمبر، وإحنا عندنا منتخب مصر ولاعيبته من الدوري وعندنا أحسن حارس مرمى في إفريقيا بشهادة الاتحاد الدولي وعندنا كمان رابع هدافي بطولة إفريقيا عبد الله مصطفى لاعب الزمالك.

- عشان كده بقولك إحنا النهارده جايين نقول إحنا موجودين، إحنا اثبتنا نفسنا الحمد لله بإرادة ربنا وبفضله وكرمه علينا، وطبعًا بالإرادة السياسية وبتوجهات الدولة، فيه حاجات كتير وأفكار كتير اتغيرت خلال الكام سنة اللي فاتوا، والحمد لله إحنا لسه عندنا أكتر، عندنا أحلام كبيرة، عايزين ناخد كأس العالم، أيوه حلمنا نكسب كأس العالم، إحنا جايين نعمل كده وإحنا قادرين ومستعدين، واختلافنا هو اللي هيوصلنا للهدف، أنا مختلف وده مش معناه إنك تنبذني لأ أنا مختلف وفي اختلافي عنك قوة تفيدك، أنا جاي بقولك عايز أكسب كأس العالم، ده حلمي اللي مع كل خطوة بيكبر وبيعلى، أنا دلوقتي هدفي أكسب كأس أمم أفريقيا، لو ده حصل هبدأ بعدها اشتغل على حلم الفوز بلقب كأس العالم.

أكثر اتنين حراس مرمى أثروا في شخصي هما كابتن ثابت البطل الله يرحمه وكابتن أحمد شوبير، الناس دي قامات كبيرة جدًا حببتني أبقى حارس مرمى، كابتن ثابت زمان وكابتن شوبير في كأس عالم 1990، مثلي الأعلى دوليًا بوفون وتولدو، ومحليًا كلهم كويسين لكن مفيش حد ممكن يبقى مثل أعلى، أنا بحب ثابت البطل وبحب اسمه وشخصيته، هو ثابت وبطل وأنا سيف، فكنت متأثر به أوي.

- وأخيرًا شكرًا لكم وللجمهور وللمسئولين ولإدارة بيراميدز ولنادي المقاولون العرب وإن شاء الله نكسب الدوري بالعلامة الكاملة ونكتب تاريخ جديد في الرياضة المصرية.