أصدرت مجموعه ألتراس أهلاوي المنتميه للنادي الأهلي بيان على صفحتها الرسميه على موقع التواصل الاجتماعي فيس بوك رداً على حبس مجموعه من أعضاء المجموعة أمام بوابات النادي قبل انطلاق مباراة كرة اليد بين الاهلي والجزيرة وجاء بيان المجموعة كالاتي :

من يوم الجمعة اللي فاتت واحنا بنتفرج على مسرحية وحتى كنا شايفين إنها مش مستاهلة مجرد التعليق عليها وقولنا إن ده أكيد تهريج وأكيد المسئولين هيتكسفوا من الاتهامات المكتوبة في المحضر.

خلينا نقول مبدئيا كدة ماتشات دوري كرة اليد طول السنين اللي فاتت بجمهور وهو الدوري الوحيد اللي بيتلعب بجمهور بشكل رسمي وجمهور الأهلي كل ماتش كرة يد بينسق من قبلها مع رئيس اتحاد اللعبه شخصيا وده اللي حصل في الماتش ده فبالتالي المشكلة مش عند الجمهور المشكلة عند اي طرف من الاتحاد او النادي .

وبالمناسبة لحد دلوقتي الماتشات بجمهور ومفيش قرار رسمي من الاتحاد المنظم للعبة بيقول كلام غير ده..

وفي مصر بيبقى على حسب المزاج ،بمعنى ان اتحاد كرة القدم بيلعب الماتشات بدون جمهور والداخلية دايما بتقول انها بتطبق قرار اتحاد كرة القدم .

طب لو النادي جه طلب الماتشات بجمهور هل الداخلية هتسمح ولا هتقول الاتحاد المنظم للعبة مانع ؟!!

ده بالظبط اللي حصل ماتجيش تقولي النادي بيطلب عدم تواجد الجمهور في حين إن الاتحاد المنظم للعبة بيسمح .

احنا بس مش فاهمين مين في الاخر اللي بيعادي مين ؟ ومين اللي بيحاول بكل جهده يبعد الجمهور عن المدرجات ويحاول يخليه يتواجد في الشارع بيجري ورا صحابه المحبوسين ؟؟

بس احنا فاهمين كويس مين بيدير موضوع الجمهور في مصر والاشيك ليكم ولشكلكم ان وزارة الداخلية تبقى بتدير اتحادات كرة القدم واليد والسلة على الملأ والمكشوف لان بجد طريقتكم خايبة وشكلكم وحش .

من ضمن الاتهامات محاولة اقتحام النادي وهو الماتش بجمهور وكمان الجمهور ماراحش ناحية النادي والامن كان مانع اي حد في الشارع يعدي من عند الاوبرا .

في اتهام تاني بالتجمهر ،، ياعم والله الماتش بجمهور !!!

اتهام كمان بمحاولة الاعتداء على قوات الأمن .. طاب مفيش ولا محضر واحد ولا تقرير طبي مثلا باللي تم الاعتداء عليهم ؟!!
وفي اتهام بقطع طريق بس لحد دلوقتي لسة محدش يعرف انهي طريق !!

بعد الطريقة الخايبة والمفضوحة دي كلها القضية اتحالت لمحاكمة عاجلة بكرة -التلات- للشباب المحبوسين وعددهم ١٩ راجل من جمهور الأهلي.

محاكمة عاجلة لجمهور كان رايح يحضر ماتش بجمهور ودي طبعا جريمة وجريمة اكبر من جرايم القتل وتجارة المخدرات في بلدنا عشان كدة اتحالت في يومين لمحاكمة عاجلة.

الحرية للجمهور