صور| النمل الأبيض يأكل أسقف منازل "المساعيد" بأسوان ويزحف إلى الجدران

الثلاثاء 20/فبراير/2018 - 12:02 م

منيرة عبده

نجع المساعيد من النجوع البسيطة التابعة لقرية سلوا بحرى بمركز كوم أمبو بمحافظة أسوان، يعيش أغلب الأهالي فوق أراضي رملية، وجبلية، وقد قاموا منذ زمن بعيد ببناء منازلهم من الطوب اللبن "الحجارة والطين" وسقفوها بجريد النخل وعاشوا في هذه المنازل لسنوات قبل أن يزحف النمل الأبيض إلى جدرانها، وأسقفها.

وقالت" عطيات أحمد"، من أهالي النجع: "زمان كانوا بيبنوا البيوت من الحجارة والطين والجريد علشان يدخل الهواء في الصيف وبيهون حرارة الجو، لكن من يوم ما ظهرت "القرضة "النمل الأبيض فى البيوت، فيه ناس بتهد وتبني بالطوب الأحمر أو الأبيض، والحديد والأسمنت"، مع إن الأسمنت بيولع نار فى الصيف، وبيدخل البرد فى الشتاء لكن ما باليد حيلة قبل البيت يقع عليهم وعلى عيالهم".

وأضافت لـ "بوابة المواطن" الإخبارية: "مش كل الناس معاها تبني بالطوب والحديد والأسمنت فيه ناس بتهد وبتبني بالطوب الأبيض، وفيه ناس بتهد السقف وتحط مواسير وساج لإن المسلح غالي، وفيه ناس بتتعامل مع "القرضة" بطريقتها لأن المبيدات مش بتنفع، فأحيانا بتحط كلور تحت أرجل الأسرة أو طوب، وساعات بتحطها فى الشمس علشان النمل ما يوصلهاش.

بينما أشار أهالي النجع إلى أن: القرضة منتشرة فى بيوت الجبل بسبب تربتها الرملية وخاصة البيوت الموجودة فى المنطقة الشرقية أخر النجع فى القرية، وأول مكان بيعشش فيه النمل الأبيض سقف البيوت لأنه مبنى من الجريد، وبتعشش في أرجل السراير الخشبية اللى موجودة ومنتشرة في أغلب بيوت القرية، وأي ورق أو كراتين مش بيبقي ليها أثر.

يذكر أن النائب حسن سيد خليل عضو مجلس النواب عن دائرة إدفو بمحافظة أسوان، قد طالب فى وقت سابق بسرعة التحرك لمواجهة خطر النمل الأبيض الذي يهدد عدد كبير من قرى المحافظة، وذلك من خلال قيام وزارة الزراعة بتفعيل وحدات مكافحة الآفات المنتشرة بالمحافظة.