فيديو .. "آكلها بملح ولا أمد إيدي لحد".. رجال قهرتهم الحاجة فهزموا السنين

الثلاثاء 04/ديسمبر/2018 - 06:00 م

مريم حسن

قوة، صبر، تحمل، كرامة تلك الصفات يمتلكها من قهرتهم الحاجة، ولكنهم تغلبوا عليها إيمانا منهم بقول الله تعالى "وقل اعملوا فسيرى الله عملكم ورسوله والمؤمنون".

وأكدت دراسة حديثة أن الأفراد الذين يعملون بعد بلوغ سن التقاعد يعانون بدرجة أقل من المشكلات الصحية، و يتمتعون بحيوية أكبر مقارنة بالمتقاعدين من الشباب؛ لذا وجب علينا إلقاء الضوء على بعض النماذج المشرفة من كبار السن الذين يعملون رغم كهلهم.

فى البداية التقينا بالحاج الديب، عامل إسكافي بالمجمع النظري بالإسكندرية، والبالغ من العمر 65 عاما، قال الديب إنه عمل سائقا فى مقتبل عمره، وأيضًا فى مجال السجاد والمفروشات، ثم بدأ عمله كإسكافي في الحرم الجامعي في كافتيريا كلية التجارة منذ 5 سنوات.

وذكر الديب أن لديه علاقات جيدة مع جميع أساتذة المجمع النظرى والطلبة، وأضاف قائلا: "بقالى 5 سنين بلمع جزم ومفيش جنيه حرام دخل جيبى"، وتابع الديب: "بيدخلى فى اليوم حوالى 50 جنيه، وبشترى علاج لمراتى بـ 150 جنيه فى الأسبوع بس عمرى ما اشتكيت وراضي، أنا حالي أحسن من غيري بكتير".

وقال أحمد عبدالمنعم، بائع ترمس "القرش لو ميجيش بالعرق والكفاح يبقى ملوش لازمة وطول ما ربنا مدينى الصحة هفضل اشتغل لحد ما أموت"، واستطرد قائلا أنا عامل عربية الترمس على ايدى ولو الإزالة خدتها منى مش عارف هعيش منين.. أنا بقف أبيع وأنا خايف من الإزالة كأنى بسرق، عاوز رجل مسؤول يشوفلى حل.. أنا كبرت وتعبت والموت بالنسبالى أحسن من اللى أنا فيه".

وناشد عبدالمنعم الرئيس عبدالفتاح السيسى للتدخل وحل مشكلة مطاردة الحى له قائلا "ياريت السيسى والحكومة اللى معاه يوفرلى مكان ثابت أقف فيه أبيع واشترى ورزقى على الله مش عليهم".

قال محمد غريب بائع مناديل، والبالغ من العمر 72 عام أنه ما زال قادر على العمل رغم تقدمه فى السن وسوء حالته الصحية، وأضاف متعجبا من المتسولين "أنا عندى أقف وأتعب وأشقى بس ميجليش دم أشحت وأمد ايدى لحد.. فى ناس بتشحت وتجيب 200 جنيه فى اليوم بس ربنا مش بيبارك ".

وأضاف "أنا كنت جاهل لا بعرف أقرأ ولا أكتب بس القعدة فى الشارع بتعلم كتير ودلوقتي بقيت بعرف أقرأ الجرنال وأفهم اللى بيحصل فى البلد".

وقال بائع نعناع، 80 سنة، أنه كان يعمل فى المعمار طوال حياته، وفى سن الخمسين سقط أثناء عمله من طابق مرتفع على الأرض؛ فتسبب ذلك فى إصابته بانزلاق غضروفى وأصبح لا يقدر على العمل، وأضاف "أنا ساكن فى الضهرية بس باجى كل يوم محطة الرمل أبيع شوية نعناع عشان المكان هنا فى ناس كتير رايحة جاية بتشترى منى".

وتابع بصوت مرتجف "أنا بدفع 600 جنيه ايجار شقة ده غير النور والمية والعلاج ونفسى الحكومة تدينى شقة رخيصة شوية.. الدنيا بقت غالية عليا أوى وأنا مش عارف أعيش".