قطر الغلابة.. لشاعر العامية "ناجح عمارة"

قبل ما يركِن
علي الرصيف
ناس بتزعق
وناس بتهيص
وهو بيزعَق
يا ولاد جاي
زعقة غريبة
ما ليها وصيف
شيِل المقطف
ضُب الشنطة
شمِر كِمك
واديها فطة
يلا عشان تلحقلك
كرسي وتركب
قطر ملِهش محطة
لسة يا دوب
هتشيل مصلحتك
يجيك الكُومسري
فارد باعة
يلا يا خال قوم
فين تذكرتك
وياخدك بالدغاغين
بدراعة
يلا يا خال
اديني فكرتك
قولي انت
راكب منين
دية عرفت
انها تذكرتك
فين تذكرة
المقطف فين
قولت يا باشا
عليا اتعطف
انا راجل
مسكين محروم
ادفع كيف
تذكرة للمقطف
هوانا راكب
قطر النوم
مكبوس جوة
يامة خلايق
فيه المحروم
و المظلوم
ناس فالطرقة
ما لابسة خلايق
طول الليل
ميجيها النوم
تخش القطر
تلقاه زاحم
ميخشش فيه
غير ابو دراع
ناس فوق بعضها
شابك لاحم
ساكن فيه
الفين بياع
مشيين ورا
بعض تقول دورية
عيش وبيض
يلي انت هتاكل
يله ياخالي
رغيف بجنية
تفتح فيه
تلقاه طعمية
بعد ما تاخد
خمسة جنية
وشوية يجيك
بياع الشاي
يله السخن
يلي هتشرب
تلقي الشاي
بارد ومكهرب
تصرخ منة
يا ولاد جاي
وبعد شوية
يجيك شحات
قليل الحيل
ولا عنده مروة
يدي القطر
عشر لفات
تلقاه برة
وتلقاه جوة
جوة القطر
تحس بخنقة
ناس غلبانة
وناس معذورة
ناس مرمية
وسط الطرقة
وناس ع الرف
وجوة الدورة
ف الصيف تلقاه
يجيبلك حمة
مفهش مراوح
ولا شبا ك
في عز الزحمة
وعز اللمة
برد الشتا
يرزع في قفاك
يله يا واد
من هنا هنفوت
ده قطر مهكع
مالك بيه
انا سميته
قطر الموت
قرفان من روحك
اركب فيه