مشهد اليوم من سلسلة مشاهد لا تنسى، هو أحد مشاهد مسلسل أبو العلا البشري للحديث عن الحب والرومانسية، والفرق بين الحب قديما وبين الحب في زمن "التيك أواي".

مشاهد لا تنسى

أبو العلا البشري (محمود مرسي): الحب النهاردة صابه اللي صاب الدنيا والناس والأخلاق، مبقاش أبدا زي الحب بتاع زمان

نجوى (نسرين): أيام ما كانت الـ3 بيضات بتعريفة ورطل اللحمة بقرش.

أبو العلا: لا يا نجوى.. أنا بتكلم جد

نجوى: أنا آسفة يا عمي

أبو العلا: أنا بتكلم عن الحب المثالي بعذريته برومانسيته بلمسة الطهر اللي فيه بروح الشاعرية اللي جواه.. زمان كنا بنحب زي ما نقرا الشعر أو نسمع مزيكا أو نتفرج على لوحات ناجي وصبري ومحمود سعيد.. كانت لمسة من الايد.. مجرد لمسة تغيبنا عن الوجدان.. كانت نظرة من العين تسهرنا للفجر.. وكانت رعشة الكلمة الحلوة على الشفايف تبكينا..

تصوري احنا كنا بنخاف من القرب أكثر ما نخاف من البعد.. وفي البعد طبعا نرجع نحن للقرب تاني.. كانت الأشياء البسيطة جدا في الحياة بيبقى ليها قيمة كبيرة أوي.. وشوشة الريح في الشجر.. نور القمر في المكان حوالينا.. كل حاجة كان بيبقى ليها معنى وطعم ومتعة.. أغاني أم كلثوم كنا نقعد نسمعها بالساعات ومنتكلمش خالص.. وفي نفس الوقت كنا بنقول كل حاجة.. عشان كدا الحب كان بيفضل وبيعيش مهما فصلت بين المحبين بلاد وفرقت بينهم جبال حتى..

نجوى: حضرتك بتقول كلام عمري في حياتي ما سمعت أحلى منه

أبو العلا: مع ذلك الكلام ده كله مبيعبرش أبدا عن التجربة الحقيقية اللي احنا عشناها

نجوى: ليه احنا كمان منعشهاش

أبو العلا: لأنكم شيلتم الفواصل.. كسرتوا الأسوار.. واختصرتوا المسافات.. اتحول الحب لاتفاق سريع مباشر كل حاجة فيه سهلة.. مقابلة وتلامس واندماج.. مبقاش فيه حاجة غالية ولا عزيزة أبدا.. مبقاش يستحق حتى المحاولة.. بقى زي ساندوتش تاكلوه وانتم ماشيين في السكة وتهضموه قبل ما توصلوا.. لما الحب بيبقى صعب بيكبر وبيعيش.

كتب هذا المشهد العبقري من مسلسل أبو العلا البشري للكاتب الكبير أسامة أنور عكاشة، وأخرجه المخرج الكبير محمد فاضل وجسده الفنانة الكبير الراحل محمود مرسي والفنانة نسرين.

اقرأ أيضا: مشاهد لا تنسى| كل شىء أصبح مزيف المبادىء والأفكار والناس