دائمًا ما تهتم المرأة بنفسها وبجمالها كما تحافظ على رشاقتها المعهودة عليها وتعتني بها لذلك يجب عليكِ الاستفادة من شهر رمضان قدر المستطاع واستغلاله في نقص وزنك.. وتقدم «بوابة المواطن الإخبارية» لك سيدتي 10 نصائح ضرورية لابد من الالتزام بها هتخليكي تخسي أسرع في رمضان.

1- تجنبي العصاير المعلبة أو المتحلية بالسكر، وأشربي العصائر الطبيعية من غير سكر.

2– ابعدي تماما عن أكل السحور قبل النوم على طول, حاولي يكون ميعاده قبل نومك بساعتين عشان تتجنبي ظهور البطن مع الوقت.

3– حاولي إنك تقللي كمية أكلك للنص عن الكمية اللي تعودتي عليها قبل رمضان, ممكن تغيري حجم الطبق اللي بتاكلي فيه وكلي في طبق اصغر عشان يساعدك على تقليل كمية الأكل, ومتمليش الطبق تاني بعد ما يخلص.

4– قبل الإفطار اشربي من كوباية لكوبايتين ميه وممكن تضيفي لها عصير ليمون.

5– حاولي تتجنبي الفواكه المجففة أو تقللي منها متاكليش منها كل يوم, لأنها بتحتوي على سعرات حرارية عالية.

6– حاولي تقللي جدا من الحلويات والسكريات, ممكن تأكلي قطعة بحجم علبة الكبريت من الحلويات, ولو هتاكلي قطايف كلي منها قطعتين بس ويفضل تكون مشوية في الفرن مش متحمرة في الزيت, واستبدلي الحلويات بالفاكهة الطبيعية.

7– دايما ابدئي الإفطار بالشوربة عشان تهيئي معدتك للأكل, وميحصلش صدمة لمعدتك وهي فاضية.

8– متنسيش السلطة الخضراء تعتبر طبق اساسي كل يوم على الفطار.

9– خلي النشويات اللي في الوجبة كليها في الأخر, يعني ابدئي بالشوربة وبعدها السلطة وبعده البروتين وفي الأخر النشويات.

10– أي مشروب رمضاني يفضل تشربيه من غير سكر.